تحولات جمهوري الأهلى والزمالك
ليه الأهلى أخد بطولات أكتر من الزمالك ، أجابة السؤال ده بسيطة جدا ومن غير تفاصيل ، وهو أن فرقة الأهلى طول عمرها أحسن من فرقة الزمالك ، طول عمر فرقة الأهلى أحسن كأفراد وكمدربين ، والأوقات اللى فرقة الزمالك فيها كانت بتبقى أحسن كانت هى اللى بتاخد البطولات و بتكسب ، وهى مرات نادرة اللى فرقة الزمالك كانت أحسن والأهلى هو اللى كان بيكسب ، ممكن موسم فى السبعينيات مثلا من اللى الواحد سمع عنهم والموسم بتاع دورى حسن شحاته اللى الأهلى خده بالتحكيم وممكن مواسم 95 و 96 اللى كانت فرقة الزمالك أحسن من الاهلى بشكل واضح لكن الأهلى كان منضبط اكتر والزمالك كان مرقوع بزيادة فالأهلى كسب فى السنتين دول الدورى مع هولمان ، ودى المرحلة اللى اتخلقت فيها اسطورة الأهلى بمن حضر وروح الفانلة والكلام ده.
يعنى بأستثناءات قليلة جدا وعلى حسب منا شفت بعينى ، فرقة الأهلى كانت بتبقى أفضل على مستوى العناصر ، عدد النجوم فى التشكيلة أكتر ، عدد اللى مستواهم ثابت أكتر ، والأهم ان مية الفرقة طول عمرها قريبة من بعض يعنى مكنش فيه تفاوت شديد بين اللعيبة ، بمعنى ان الفئة التانية فى اللعيبة أحسن بكتير من الفئة التانية فى لعيبة الزمالك ، وعشان كده اللعيبة الأخرام فى الأهلى كانت تاريخيا قليلة جدا قياسا باللعيبة الأخرام فى الزمالك وده اللى كان بيعمل فرق فى مواسم كتير الفرق فيها بين الفرقتين كان مش كبير ، يعنى الاهلى مثلا عمره ما كان عنده حارس مرمى منعدم الموهبة الا خالد الضبع انما الزمالك عدى عليه حراس مرمى ضيعته كتير من اول طارق عبد العليم وناصر عبد اللطيف واسماء الناس ناسياها أصلا .
وحتى زمالك التمانينات اللى هو اكتر زمالك كان محافظ على مستواه لفترة طويلة ، كانت فرقة الأهلى نجومه أعلى واحسن منه وتعمل فرق واضح مهما كان الزمالك كويس ، والأسماء اهيه موجودة ونقدر نحكم ، وأكيد محمود الجوهرى كان أحسن من محمود ابورجيله وعصام بهيج ، القصد يعنى أن مهما كانت كورة القدم فى مصر متصممة لصالح الأهلى بحكم أنه الأكثر جماهيرية بشكل طاغى وغير متناسب وبشكل ميسمحش بوجود منافسة أصلا ، لأن مفيش بلد اكتر من تمانين فى المية من سكانها بيشجعوا نادى واحد ، ده موضوع شاذ واسبابه غير كروية أصلا بس مش ده مجال الحديث ، أقصد أن بالرغم من كل ده ففى الأخر دى كورة يعنى ، وفى الكورة معظم الوقت فرقة الأهلى أحسن من فرقة الزمالك ، عشان كده الاهلى بيكسب أكتر وده متغيرش كتير مع الزمن ، بسيطة يعنى .
اللى أتغير فى رأيي مع الزمن هو جمهور الأهلى ، أو الكتلة الأكثر ظهورا فيه ، زمان كان جمهور الأهلى جمهور بيب بيب بالمعنى الحميد للكلمة ، والبيب بيب معناها أن معظم الناس كانت بتشجع الأهلى من غير ما تكون بتتفرج على كورة أصلا ، يعنى أمى مثلا ربنا يديها الصحة اهلاوية وشايفه أن الصح والطبيعى ان الانسان يبقى اهلاوى وهى مبتفتحش التلفزيون أصلا ، زمان كان ده كتير لأن اللى بيتفرجوا على الكورة مكنوش كتير ، وكان برضة السواد الأعظم من الناس أهلاوية والغالبية الكبيرة من السواد الأعظم دول مش بيتفرجوا على كورة أصلا ومن هنا جه البيب بيب ، وعشان كده جمهور الأهلى زمان كان جمهور وطنى ملوش فى حزق الكورة أوى ، وكان بيروح ماتشات الزمالك والاسماعيلى فى الاستاد يشجعوهم وهم بيلاعبوا فرق أفريقية ، يعنى هو الاسماعيلى سنة 1970 وهو بياخد بطولة افريقيا والإستاد ساعتها كان عدد الجمهور جواه كتير لدرجة ممكن تسبب كارثة ، هل الجمهور ده كان جمهور الأسماعيلى مثلا !!
فيه حقيقة تاريخية بينكرها كتير من الزملكاوية بعد ما كتروا ومصر كبرت عددا عموما وهى أن جمهور الزمالك زمان مكنش بيعرف يملأ مدرجاته فى ماتشات الأهلى والزمالك لحد بداية التمانينات ، وإن الماتشات الكبيرة اللى الجمهور ملى فيها الاستاد للزمالك زى ماتش جيت تيزى أوزو الجزائرى كان سبب رئيسى فيها هو أن جمهور الأهلى راح شجع الزمالك ، والحقيقة ان يمكن لحد نص التسعينيات ويمكن أواخرها كان ممكن جمهور الاهلى البيب بيب يروح يشجع الزمالك فى أفريقيا لأسباب وطنية ، وده كان بيخلى زملكاوية متعصبين يتخانقوا معاهم فى المدرجات ويغلسوا عليهم ويسألوهم ايه اللى جابكم مش عايزينكم .
فهو جمهور الأهلى التاريخى اللى بيمثل الكتلة الأكبر من الشعب المصرى تقريبا كان جمهور بيب بيب ولطيف ، وكان جواه كتلة بقى بتاعة كورة فعلا ، والكتلة دى كانت تايهة طبعا وسط بحر البيب بيب ، وعشان كده اتعملت أسطورة الزمالك بتاع ان الأهلاوية جهلاوية ، وده لأن نسبة اللى بيفهموا فى الكورة وسط جمهور الزمالك القليل اصلا كانت أعلى من نسبتهم وسط جمهور الأهلى وسط جمهورهم الكبير جدا ، بس كل ده كان زمان ، الصورة اتغيرت مع الدش وبعديه النت ومع الفرجة على بره ومع وجود روابط تشجيع متأثره ببره ، مشكلة لحظة التحول والأنفتاح على العالم والانترنت دى إنها تزامنت مع انتهاء الزمالك كفريق كورة وللأبد ، فالكتلة الجديدة الظاهرة لجمهور الزمالك بقى كتلة سنظل أوفياء مش الفن والهندسة
أما الكتلة الأبرز فى جمهور الأهلى بقت كتلة أسياد العالم واسياد الغابة واعظم ألوط فى الكون وفوق الجميع مش البيب بيب ولا الأهلى حديد ، صحيح مع الوقت الجمهور كله بقى بيتابع كورة احسن وفاهم فيها أكتر وخاصة جمهور الأهلى اللى كان زمان جمهور بسيط كرويا ، فى مقابل ان جمهور الزمالك بقى زياط اكتر وبقى تذوقه للكورة أسوأ بكتير عن زمان لأن فرقتهم بقت فرقة وحشة وبقم مطالبين يالتعايش مع ده ، لكن فى المجمل الجمهور ده كله بقى رخم أوى ومش مريح ، وبالرغم من ان الكورة فى المجمل اتحسنت وأتطورت من التسعينيات إلا إن الجمهور مع الوقت بقى ثقيل الظل وعصبى و بيحب الكراهية .
ليه الأهلى أخد بطولات أكتر من الزمالك ، أجابة السؤال ده بسيطة جدا ومن غير تفاصيل ، وهو أن فرقة الأهلى طول عمرها أحسن من فرقة الزمالك ، طول عمر فرقة الأهلى أحسن كأفراد وكمدربين ، والأوقات اللى فرقة الزمالك فيها كانت بتبقى أحسن كانت هى اللى بتاخد البطولات و بتكسب ، وهى مرات نادرة…
الوسوم والمفاتيح
أقباط أممية أنور السادات إسرائيل الأهلى الإخوان المسلمون الإسلاميون الإسماعيلى التطبيع التفويض الثورة الفلسطينية الثورة المصرية الجمهورية الجيش الربيع العربى الزمالك السيسى السينما المصرية الشيوعيون الصحوة الإسلامية الصين الطبقة الوسطى الفاشية الكورة المصرية المراجعة الوطنية المصرية الولايات المتحدة اليسار تاريخ العصامية والجربعة ترامب تيران وصنافير جمال عبد الناصر حرب أكتوبر حريق القاهرة حسنى مبارك دولة يوليو صلاح نصر فلسطين ماسبيرو مرأة مصر نسوية نوستالجيا هزيمة يونيو يناير
