ما تفتح التتش بقى يا بيبو

• by محمد نعيم
• 29/11/2017

يا جماعة انا بحب محمود الخطيب اوى والخطيب أحسن واحد لعب كورة فى مصر فى القرن العشرين و كل لمسة كورة ليه كانت جميلة والخطيب فى الكورة هو أسطورة القرن العشرين للنادى الأهلى مش صالح سليم .. ونزيد على ده أن الخطيب حظه حلو مع الناس لان كل ما سبق وبالذات لحظة ظهوره وبزوغه فى نص السبعينيات كانت لحظه الناس محتاجه فيها تحب حد وكانت الكورة لسه راجعه بعد سنين طويلة من التوقف فهو خد حب كبير جدا من الناس وتقريبا حب غير مشروط وهو كمان ” البيرسونا ” بتاعته ساعدت على ده من حيث كونه شاب حليوة عينيه خضرا وطول بعرض ومهذب وتقيل ومبيعملش مشاكل وكان بيتصاب كتير فكان عبد الحليم حافظ على عمر الشريف ، ولانه شخص ذكى اجتماعيا جدا فالخطيب عمل حاجه محدش فى الكورة عرف يعملها قبله ولا بعده وهو انه اللعيب الوحيد اللى قدر يكون فوق مستوى النقد – مهما عمل او مهما اخفق – ودى حاجه مش سهلة فى بلد شردوحة زى مصر .

بس أنا برضه رأيي ان الخطيب سخر معظم مجهوده للأنفاق على ” البيرسونا ” دى بشكل يخليه وهم او أسطورة يجب وأن لا تتحقق عشان تفضل محافظة على نفسها ، محدش عمره شاف الخطيب بيتخانق او بيتنرفز ولا عمر حد شافه داخل صراع محلى الطابع وكان دايما بيترفع وياخد جنب ولما مسك المنتخب مع فاروق جعفر وكان فاشل فشل الديناصور عمل حركة شيك ورجع المرتب اللى قبضه من اتحاد الكورة .. بس فعلا انا رأيي ان سحر الخطيب جى من كونه مستخبى وهو مستخبى حتى من اخر ايامه فى الكورة لما كان رابط ركبه وفخد وبيلعب .. وبرئاسة الخطيب للأهلى لن يصبح مختبئا مرة أخرى وسيواجه الجميع الواقع كما هو وستتحطم كل البدع الخطابية المملة .

جانب من سوء حظ الخطيب فى المرحلة القادمة هى إن الكورة بشكلها القديم بينتهى ، بما فيها مهابة الأندية والمؤسسات ، وصيغة إستثمار الدولة فيها حتختلف ، لأن خلاص بقى فيه تصالح مع إن الكورة من غير جمهور وإن غرضها هو الشو الإعلامى بحيث تلخم الناس فى تريندات مستمرة معظمها ملوش دعوة بالكورة نفسه وده يبان من خلال حضور شخص زى مرتضى منصور اللى هو ألة تسلية إعلامية مستمرة لا تتوقف لكن بشكل قايم على الهزاءة والتوتر وقلة القيمة ، الجو ده على بعضيه  حيخلى موقع رئيس مجلس إدارة النادى الأهلى مش حيكون بنفس مكانة زمان ، وده اللى مش فاهمه قطاع واسع من الجمهور ومتخيلين إن المشكلة الحالية سببها شخص محمود طاهر وتركيبته وخلفيته  ، حكم إحنا الأشخاص عندنا أهم من البنية  بتاعة اللعبة والسياق العام اللى بتتلعب فيه ألف مره .

الكورة فى مصر بتنحط بشكل غير مسبوق و طبيعة الكورة فى مصر اتغيرت بالتغير اللى حصل فى العالم وبمعنى من المعانى الكورة فى مصر مبقتش محطة مستقرة لمشاريع وحالات هى بقت حالة انتقالية مستمرة .بحيث اللعيبة المصرية الموهوبة بقى ينفع تطلع بره وبقى وجودها بره اسهل بكتير وكمان اللعيبة دى بقى الفرق واضح اوى فى ذهنها بين مصر وبره واى حد يقدر يبقى ناجح بره ولو بشروط نص نص مش حيتردد يسيب  ، نفس الشيى ينطبق على المواهب الافريقية الشابة  والدورى المصرى كمان بقى محطة اعتزال ولعب ع الواقف لناس حسمت انها مش قادرة على بره ، وبالتالى معدل الدوران عالى بالتعريف فالفرق ملهاش شكل ومش حيبقى ليها شكل ، و بالرغم من أن جمهور الأهلى بيعشق البطولات ودواليب البطولات  لكن حيظل حاسس بأن فيه حاجة غلط بس مش قادر يمسكها ومحورها انه مش مبسوط ومش متكيف ومش راضى

فأنا ككاره عظيم للنادى الأهلى – أصل الكورة فى مصر و مبتداها ومنتهاها – بأتمنى بشدة فوز الكابتن الأسطورة محمود الخطيب برئاسة النادى الأهلى .. زى كده ما بأتمنى أن الناس تلاقى عبد الناصر بشحمه ولحمه طالع عليها فى التلفزيون وبيقول انا رجعت اهوه يا جماعة ، لأن الكورة المصرية المنحطة والوضيعة عدوة المنافسة وقاتلة الجماهير وباعثة الملل واللى قلبها الصلب هو النادى الاهلى تستحق عقاب درامى وتستحق أن يسدل عليها الستار فى ظل ورعاية أعظم من أنجبت وأكثر من أحبت .

والله ولى التوفيق وبالتوفيق

يا جماعة انا بحب محمود الخطيب اوى والخطيب أحسن واحد لعب كورة فى مصر فى القرن العشرين و كل لمسة كورة ليه كانت جميلة والخطيب فى الكورة هو أسطورة القرن العشرين للنادى الأهلى مش صالح سليم .. ونزيد على ده أن الخطيب حظه حلو مع الناس لان كل ما سبق وبالذات لحظة ظهوره وبزوغه فى…